महाराष्ट्रराजकारण

‘राजसाहेब माफ करा..’ असं लिहुन मनसे पदाधिका-याची आत्महत्या

Newsliveमराठी – किनवट येथील महाराष्ट्र नवनिर्माण सेनेचे शहरप्रमुख सुनिल आनंदराव ईरावार वय 27 वर्षे यांनी स्वत:च्या राहत्या घरी गळफास घेऊन आत्महत्या केली. हि घटना काल (रविवारी) सकाळी घडली असावी, असा अंदाज पोलिसांनी व्यक्‍त केला आहे. आत्महत्येपूर्वी ईरावार यांनी लिहिलेल्या ‘सुसाईड नोट’ मध्ये ‘अखेरचा जय महाराष्ट्र’ करून राजकारण करण्यासाठी माझी आर्थिक परिस्थिती कमजोर असल्यामुळे मी माझे जीवन माझ्या मनाने संपवत आहे. तरी माझ्यामुळे कोणालाच त्रास देऊ नका, असा उल्लेख केला आहे.

आत्महत्येपूर्वी ईरावार यांनी लिहिलेल्या छोट्याशा पत्रात त्यांनी आपल्या आईची व कुटुंबियांची माफी मागितली आहे. तसेच मनसेप्रमुख राज ठाकरे यांना उद्देशून लिहिले आहे की, राजसाहेब, मला माफ करा. आमच्या येथे पैसा आणि जात या गोष्टीवर राजकारण आहे आणि दोन्ही माझ्याजवळ नाही, असे म्हटले आहे. यावरून किनवट पोलिस ठाण्यात आकस्‍मिक मृत्यूची नोंद करण्यात आली आहे. पुढील तपास बीट जमादार गजानन चौधरी हे करीत आहेत.