देश-विदेश

पाकिस्तानच्या गोळीबारात दोन जवान शहीद

टिम Newslive मराठी: जम्मू-काश्मीरच्या कुपवाडा जिल्ह्यात शुक्रवारी पाकिस्तानकडून नियंत्रण रेषेचे उल्लंघन करण्यात आले. पाकिस्ताननं केलेल्या गोळीबारात भारताचे दोन जवान शहीद झाले आहेत. किरेन सेक्टरमध्ये पाकिस्तानी सैनिकांनी अंदाधुंद गोळीबार केला, अशी माहिती लष्करातील एका अधिकाऱ्याने दिली.

पाकिस्तानच्या गोळीबारात ज्युनिअर कमिशंड अधिकारी (जेसीओ) शहीद झाले. तर अन्य एक जवान गंभीर जखमी झाला होता. हॉस्पिटलमध्ये उपचार सुरू असताना हा जवान शहीद झाला. पाकिस्तानच्या गोळीबाराला भारतीय जवानांनीही जशास तसे उत्तर दिले, असेही या अधिकाऱ्याने सांगितले.

गुरुवारी लष्कर कमांडरने जम्मू-काश्मीरच्या पूंछ आणि अखनूर सेक्टरमधील नियंत्रण रेषेवरील (एलओसी) चौक्यांचा दौरा केला होता. त्यानंतर दुसऱ्या दिवशी पाकिस्तानी सैनिकांनी भारतीय जवानांवर अंदाधुंद गोळीबार केला आहे.

जनरल अधिकारी कमांडिंग-इन-चिफ लेफ्टनंट जनरल रणबीर सिंह यांनी राष्ट्र विरोधी आणि नापाक कारवाया उधळून लावण्यासाठी सज्ज राहावे, असा इशारा जवानांना दिला होता. रणबीर सिंह यांच्यासोबत यावेळी कमांडर लेफ्टनंट जनरल परमजीत सिंह हेही उपस्थित होते. गेल्या काही दिवासांपासून पाकिस्तानकडून नियंत्रण रेषेचे उल्लंघन करण्यात वाढ झाली आहे.

Leave a Reply

Your email address will not be published. Required fields are marked *